ह्वात्तै बढ्यो सुनको मूल्य,तोलामा कति पुग्यो? हेर्नुहोस् आजको मूल्य
एक सातामा सुनको मूल्य प्रतितोला एक हजार ५०० रुपैयाँले बढेको छ । नेपाल सुनचाँदी व्यवसायी महासङ्घका अनुसार अघिल्लो साताको शुक्रबारदेखि यो साताको शुक्रबारसम्म सुनको मूल्य १५ सय रुपैयाँले बढेको हो ।
अघिल्लो साताको शुक्रबार छापावाल सुनको मूल्य प्रतितोला ८९ हजार ७०० रुपैयाँ र तेजाबी सुनको प्रतितोला मूल्य ८९ हजार २५० रुपैयाँ कायम थियो ।
यो साताको शुक्रबारसम्म आइपुग्दा १५ सय रुपैयाँले बढेर छापावाल सुनको मूल्य प्रतितोला ९१ हजार २०० र तेजाबी सुनको मूल्य प्रतितोला ९० हजार ७०० रुपैयाँ कायम छ ।
साताको आइतबार प्रतितोला एक हजार रुपैयाँ बढेर सुनको कारोबार सुरु भएको थियो ।
त्यसपछि साताका सोमबार र बिहीबार केही ओरालो लाग्नु बाहेक अन्य सबै कारोबार दिनमा सुनको मूल्य बढेको महासङ्घले जनाएको छ ।
यस्तै, यो साता चाँदीको मूल्य प्रतितोला १० रुपैयाँले बढेको छ । गत साताको शुक्रबार चाँदीको मूल्य प्रतितोला एक हजार १८५ रुपैयाँ थियो ।
जुन, यो साताको शुक्रबार एक हजार १९५ रुपैयाँ कायम भएको छ ।
नेपालले दिगो विकासको लक्ष्य भेट्न वार्षिक ५ खर्ब ८५ अर्ब रुपैयाँ लगानी अपुग
दिगो विकास हासिल गर्ने नेपालको लक्ष्यमा वार्षिक औसत ५ खर्ब ८५ अर्ब रुपैयाँ लगानी अपुग देखिएको छ ।
महालेखा परीक्षकको कार्यालयले शुक्रबार सार्वजनिक गरेको ५८ औं वार्षिक प्रतिवेदन अनुसार दिगो विकासको लक्ष्य हासिल गर्न ठूलो रकम अपुग देखिएको हो ।
नेपालले विश्वका १९३ मुलुकसँगै सन् २०३० सम्म दिगो विकास हासिल गर्ने लक्ष्य लिएको छ ।
त्यसका लागि प्रत्येक वर्ष २० खर्ब २५ अर्ब रुपैयाँ लगानी आवश्यक पर्छ ।
तर, आवश्यकताअनुसार लगानी रकम अपुग भएको प्रतिवेदनले देखाएको हो ।
प्रतिवेदनमा अपुग रकमको जोहो गर्न राजस्वका दायरा विस्तार गरेर थप राजस्व संकलन गर्ने, वैदेशिक सहायताको उच्चतम परिचालन गर्नेतर्फ अग्रसर हुनुपर्ने उल्लेख छ ।
र, समग्र वित्त नीति तर्जुमा गर्ने जिम्मा अर्थ मन्त्रालयको भएकाले यसको नेतृत्व अर्थले नै गर्नुपर्ने देखिएको छ ।
यस्तै, दिगो विकास लक्ष्य कार्यान्वयनका लागि नेपालले संयुक्त राष्ट्रसंघमा स्वैच्छिकरुपमा पेस गरेको २१८ सूचकमध्ये अधिकांश सूचकमा निर्धारण गरिएको लक्ष्यभन्दा न्यून प्रगति भएको देखिन्छ ।
नेपालले राष्ट्रिय समिक्षा प्रतिवेदन, २०२० तथा दिगो विकास लक्ष्य प्रगति मूल्यांकन प्रतिवेदन २०१९ बमोजिम राष्ट्रसंघमा उक्त सूचक उपलब्ध गराएको थियो ।
सन् २०३० मा दिगो विकासका लक्ष्य भेट्न सन् २०१९ सम्ममा दैनिक १.२५ अमेरिकी डलर भन्दा कम आर्जन गर्ने जनसंख्या १७ प्रतिशतमा सिमित राख्ने लक्ष्य मापन नै भएको छैन ।
प्रतिदिन १.९० अमेरिकी डलर आर्जन गर्ने जनसंख्या २८.५ प्रतिशतमा झार्ने लक्ष्य १५ प्रतिशतमा सिमित छ ।
यसैगरी, विश्व खाद्य सुरक्षा सूचकांकमा ५७ अंक प्राप्त गर्ने लक्ष्य लिएपनि ४६ अंकमात्र प्राप्त भएको तथा सामाजिक सुरक्षा खर्च १२.१ प्रतिशत हुने लक्ष्य भएकोमा ११.७ प्रतिशत लक्ष्य हासिल भएको देखिएको छ ।
यस्तै, नवीकरणीय उर्जामा जलविद्युतको जडित क्षमता २ हजार ३०१ मेगावाट पुर्याउने लक्ष्यमा हालसम्म १ हजार २५० मेगावाट पुगेको र यी लगायत अन्य धेरै सूचकांकमा नेपालको सुधार सन्तोषजनक नदेखिएको प्रतिवेदनमा उल्लेख छ ।
