मोटरसाइकलको ठक्करबाट महिलाको मृत्यु
कैलालीको टीकापुर नगरपालिका–१, टीकापुर पार्कमा मोटरसाइकलको ठक्करबाट एक महिलाको मृत्यु भएको छ ।
बुधबार बिहान ८ बजे नम्बर नखुलेको मोटरसाइकलको ठक्करबाट टीकापुर नगरपालिका १० बस्ने ६० वर्षीया पद्मा साउदको मृत्यु भएको हो ।
दुर्घटनामा गम्भीर घाइते भएकी उनलाई उपचारको लागि अस्पताल लैजाने क्रममा बाटोमै मृत्यु भएको ईलाका प्रहरी कार्यालय टीकापुरले जनाएको छ ।
दुर्घटनामा संलग्न मोटरसाइकलसहित चालक फरार रहेको र उनको खोजी भइरहेको प्रहरीले जनाएको छ ।
धुलिखेलमा सुन चोरेर भागेका ३ जना पक्राउ
काभ्रेको धुलिखेमा सुन चोरेर भागेका ३ जनालाई प्रहरीले पक्राउ गरेको छ । धुलिखेल नगरपालिका–७ स्थित सूर्यप्रसाद देवजुको घरमा ताल्चा फोडेर चोरी गर्नेहरुलाई जिप्रका काभ्रेको टोलीले पक्राउ गरेको हो ।
पक्राउ पर्नेमा सिन्धुपाल्चोकको इन्द्रावती गाउँपालिका घर भएका हेम बहादुर तामाङ, कर्म तामाङ उर्फ कर्मा र बेल बहादुर नकर्मी उर्फ राजकुमार छन् ।
देवजुको घरमा बस्ने होमबहादुर राउत र रन्जन रेग्मीको डेराको ताल्चा फोडेर उनीहरुले १ तोलाको सिक्री, १ तोलाको झुम्का, १ तोलाको छड्के तिलहरी र सिरबन्दी लगायतका गहना चोरेका थिए ।
चोरीमा संलग्न आरोपीहरुलाई काठमाडौं, भक्तपुर र सिन्धुपाल्चोक बाट पक्राउ गरिएको हो ।
उनीहरुविरुद्ध चोरी मुद्दामा म्याद लिएर अनुसन्धान भइरहेको जिल्ला प्रहरी कार्यालयका काभ्रेका प्रवक्ता (डिएसपी) हरि खतिवडाले बताए ।
ज्याला, मजदुरी गर्ने पारिवारीक पृष्ठभूमिका आरोपीहरुले धनाढ्य जीवनशैलीको मोहका लागी चोरी गरेको प्रहरीलाई बताएका छन् ।
चोरीमा संलग्न ३ जना आरोपी ५ बर्ष जेल बसेर निस्केका हुन् ।
