नेता धर्मेन्द्र बाँस्तोलालाई २४ घन्टाभित्र हाजिर गराउन सर्वोच्च अदालतको आदेश

१५ माघ, काठमाडौं । विप्लव समूहका नेता धर्मेन्द्र बाँस्तोलालाई २४ घन्टाभित्र हाजिर गराउन सर्वोच्च अदालतले आदेश दिएको छ ।

न्यायाधीश मनोजकुमार शर्माको इजलासले बन्दीप्रत्यक्षीकरणको आदेश किन जारी हुनु नपर्ने हो ? त्यसको आधार कारणसहित बाटो म्यादबाहेक २४ घन्टाभित्र बन्दीसहित जवाफ पेश गर्न भनेको हो ।

अदालतले बाँस्तोलामाथि कुनै कसूरमा अनुसन्धान भइरहेको भए, त्यसको सक्कल मिसिलसहित उपस्थित हुन पनि भनेको छ ।

उनलाई २८ पुसमा मकवानपुर र ललितपुरको सीमा क्षेत्रबाट प्रहरीको विशेष ब्युरोले पक्राउ गरेको थियो । हाल ललितपुर प्रहरी परिसर, जावलाखेलमा राखेर उनीमाथि अनुसन्धान भइरहेको छ ।