ओलीले निरंकुश चरित्र देखाए, उनको पतन निश्चित : राजेन्द्र महतो

१० माघ, काठमाडौं । जनता समाजवादी पार्टी (जसपा) का वरिष्ठ नेता राजेन्द्र महतोले प्रधानमन्त्री केपी शर्मा ओलीको पतन निश्चित रहेको बताएका छन् ।

सप्तरी सदरमुकाम राजविराजमा आयोजित पत्रकार सम्मेलनमा नेता महतोले केपी ओलीले हिटलर, निरंकुश र नश्लीय चरित्र देखाएकाले उनको पतन निश्चित रहेको बताए ।

लोकतन्त्रलाई धरापमा पार्दै प्रतिगमनतिर लम्केर नै ओलीले संसद बिघटन गरेको महतोको भनाइ छ । ‘प्रतिगमनकारीको पतन भएको छ र उनको पनि हुन्छ,’ महतोले भने, ‘तर पतन हुने बेलामा मेरो नाम लिएर बाँच्ने प्रयास गरिरहेका छन् ।’

‘जनताले प्रतिगमनको साथ नदिएपछि जसपातिर जनलहर पैदा भएको छ । त्यसलाई रोक्न जसपा नेता मेरो पार्टीमा आउँदैछ भन्ने भ्रम फैलाउने र जनसैलाब रोक्ने प्रयास गरिरहेका छन्,’ उनले भने, ‘तर यो सफल हुँदैन ।’